پښتین: پر سولهییز پرلت شوی برید بشري جنایت دی او پر ضد یې ټوله پښتونخوا کې اعتراضونه کوو
د پښتون ژغورنې غورځنګ مشر منظور پښتین په خپلې اېکس پاڼه دغه برید د پاکستان د پوځ کار بللی او لیکلي یې دي، دا له پښتنو سره انتهايي ظلم او د دغه قوم سره ښکاره دښمني ده.
هغه وړاندې لیکلي، چې د ترهګرۍ پر ضد په سولهییزو لاریونونو او پرلتونو بریدونه د ولسواکۍ سره په ټکر کې چاره ده او دا ګوت څنډنه یې هم کړې، چې دوی به د دغسې ظلمونو پر ضد په ټوله پښتونخوا کې پراخ لاریونونه وکړي.
د پاکستان په پارلمان کې پخواني سناتور او سیاستوال افراسیاب خټک هم په اېکس پاڼه لیکلي چې، په بنو کې د سولې په ستر لاریون کې په ډزو سره حکومت وښوده، چې هغوی په خپله د ترهګرو ملاتړي دي، د پښتونخوا خلک له تېرو پنځو کلونو راهیسې د ترهګرۍ پر ضد لاریونونه کوي او په خپلو سیمو کې د امن او امان غوښتنه کوي.
د پاکستان د نشنل ډیموکراټیک ګوند مشر او په قومي اسمبلۍ کې پخواني غړي محسن داوړ پر اېکس پاڼه لیکلي، چې د بنو په ولسوالۍ کې دولتي ترهګري روانه ده.
هغه وړاندې لیکلي، د بنو والو ستره ګناه دا وه چې د ترهګرۍ او د حکومت په لاس د جوړو شویو طالبانو د وحشت پر ضد یې د اعتراض غږ اوچتولو.
هغه دا رنګه لیکلي، د دغې پېښې عاملین د بشري جنایت کوونکو په شان باید نړۍوالو محکمو ته راکاږل شي.