کورنی کرېکټ؛ ماهيپر ستوري لوبډلې پامير لېجنډز ته په يوه ویکټه ماته ورکړه
د افغانستان د کورني کرېکټ د اووم پړاو لېسټ اې سیالیو په شپږمه لوبه کې ماهيپر ستوري لوبډلې د پامير لېجنډز لوبډلې ته د يوې ويکټې په توپير ماتې ورکړه. دا په یادو سياليو کې د ماهيپر ستوري لوبډلې دویمه بريا ده، چې تر لاسه کوي يې.
د کورني کرېکټ لېسټ اې یو ورځنیو سیالیو د سې شنبې د ورځي د شپږمې لوبې پچه ماهیپر ستوري لوبډلې وګټله او لومړی یې د پامیر لېجنډز پر وړاندې د توپ اچونې پرېکړه وکړه.
پامیر ليجنډز لوبډلې د خپلو ۷ لوبغاړو په سوځېدو سيالي لوبډلې ته ۲۶۶ منډې هدف وټاکه.
د ليجنډز په لوبډله کې ناصرجمال ۵۹، شاهدالله کمال ۴۹ او دروېش رسولي ۴۶ تر نورو ډېري منډې وکړې.
د ماهيپر لوبډلې په توپ اچوونکو کې ظاهر خان او محمد سليم دوه - دوه لوبغاړي وسوځول.
ماهيپر ستوري لوبډلې د ۹ لوبغاړو په سوځېدو په ۴۸،۴ اور کې ټاکل شوی هدف پوره کړ او لوبه يې د يوې ويکټې په توپیر وګټله.
د ماهيپر ستوري په لوبډله کې محمد اسحاق په ۸۶ توپونو ۹۶ مندې جوړي کړې او د لوبې غوره لوبغاړی هم وټاکل شو.
ماهيپر ستوري لوبډلې د نن ورځې په لوبې کولو سره په دې سياليو کې درې لوبې تر سره کړي، چې دوې لوبې يې ګټلې او په يوه کې يې ماته خوړلې ده.
پامیر لېجندز لوبډلې بيا په یو ورځینو سیالیو کې د نن ورځي د لوبډلې په ګډون درې لوبې سر په سر بایللې دي.
