طالبان: د غږیزې ککړتیا د مخنیوي لپاره مو تر ۱۵۰ زیات لاسپېکرونه ټول کړل

د طالبانو تر واک لاندې د چاپیریال ساتنې ادارې د کابل ښار په بېلابېلو سیمو کې د غږیزې ککړتیا د مخنیوي لپاره د څه باندې ۱۵۰ لاسپېکرونو د راټولو خبر ورکړ. پر کابل سربېره ولایتونو کې هم خلک د جوماتونو د لاسپېکرونو له لوړ غږ شکایت لري، خو طالب چارواکو په دې هکله کوم اقدام نه دی کړی.

د کابل لپاره د طالبانو د چاپېریال ساتنې ادارې رییس احمد فیصل بریالی وایي، چې دا ۱۵۰ لاسپیکرونه د یوې اونۍ په ترڅ کې له کوچنیو کاروباریانو را ټول شوي دي.

د نوموړي په خبره، د غږیزې ککړتیا د مخنیوي لپاره یې تر هغه وروسته اقدام وکړ، چې ځینې کابل مېشتو د رسنیو له لارې له لوړ غږ لرونکو لاسپیکرونو شکایت وکړ.
احمد فیصل بریالی زیاتوي، چې تر دې پرېکړې وروسته یې د جوماتونو ریاست ته هم د یوه مکتوب په استولو سره له دې ریاسته وغوښتل، چې په جوماتونو کې د جمعې په خطبو کې خلکو ته په دې اړه عامه پوهاوی ورکړل شي.
د ښاغلي بریالي په خبره: «د لاسپیکرونو له لوړ غږ ټولنه او بیا په ځانګړې توګه ماشومان، ناروغان، سپین ږیري او سپین سرې کړیږي»
سره له دې چې د طالبانو تر واک لاندې کابل ښاروالۍ تېر کال په همدې شپو او ورځو کې د غږیزې ککړتیا د مخنیوي لپاره په پلازمېنه کې د لاسپیکرونو پر استفادې بندیز ولګولو، خو بیا هم دا ستونزه هواره نه شوه.
د کابل اوسېدونکو په ځلونو غږیزه ککړتیا لویه چاپېریالي ستونزه بللې ده او له مسوولینو غواړي، چې د دغې ستونزې د حل لپاره جدي اقدامات وکړي.
اخوا روغتیا پالان بیا وایي، چې غږیزه ککړتیا د انسانانو عصبي فعالیتونه زیانمنوي.
که څه هم لاس پلورونکي لاسپیکرونو ته جدي اړتیا لري، خو د طالبانو د چاپېریالي چارو د څارنې او پلټنې رییس بیا د لاس پلورونکو او کوچنیو کاروباریانو دغې ستونزې ته د رسېدو په اړه د بدیلو لارو په اړه څه نه دي ویلي.
د یو شمېر راپورونو له مخې، غږیزې ککړتیا په نړۍ کې د نېږدې ۴۵۰ میلیونه وګړو روغتیا اغېزمنه کړې ده.
هر کال د غږیزې ککړتیا له امله په نړۍ کې لسګونه زره کسان ژوند له لاسه ورکوي او د میلیونو کسانو د اورېدو توان زیانمنوي.