د عدت دوسیه کې د عمران خان او بشرا بي بي د سزا ځنډولو غوښتنې رد شوې

د اسلام اباد محکمې د پاکستان د پخواني لومړي وزیر عمران خان او د هغه د مېرمنې بشرا بي بي د عدت په وخت د نکاح دوسیه کې د سزا ځنډولو غوښتنې رد کړې. د محکمې له دې پرېکړې سره دواړو ته د ۷ـ۷ کاله بند سزا بیا پر ځای شوه، خو دوی په نورو محکمو کې د بیا کتنې یا استیناف غوښتنه کولی شي.

د بشرا خان پخواني مېړه خاور مانیکا د تېر کال د نومبر پر ۲۵ محکمه کې عریضه وکړه چې له ده د بېلېدو وروسته د عدت موده پوره نه وه چې مېرمن خان له عمران خان سره واده وکړ.

د اسلام اباد محکمې یوه قاضي قدرت الله د دې دوسیې په تړاو د تېرې پرورۍ پر دریمه پرېکړه کې عمران خان او بشرا بي بي په اوه اوه کاله بند او پنځه پنځه لکه روپیو جرمانې محکوم کړل.

په مقابل کې د عمران خان وکیلانو د دې سزا ځنډولو لپاره غوښتنې وکړې.

خو د محکمې د نننۍ لس مخیزې پرېکړې اورولو کې قاضي محمد افضل مجوکا وویل، دې دوسیه کې د سزا ځنډولو لپاره کوم کره دلیلونه نه دي وړاندې شوي.

د محکمې پرېکړه کې ویل شوي چې د دوی د حکم خلاف عمران خان او بشرا بي بي د بیا کتنې غوښتنې به هم په دغه عدالت کې چلېږي او د اسلام اباد ستره محکمه به د جولای تر ۱۲ پرېکړه کوي.

د پاکستان د تحریک انصاف ګوند یو مهم مشر او قامي اسمبلۍ کې د اپوزیسیون مشر عمر ایوب د محکمې د نننۍ پرېکړې په غندلو سره وايي چې په ستره محکمه کې به یې ډېره ژر چلنج کړي.

د هغه په خبره، د قانون او انصاف غوښتنه دا وه چې دې دوسیه کې سزا ختمه شي، خو دا دوسیه سیاسي شوې او د سیاسي مشرانو پرضد ترې د وسلې په توګه کار اخیستل کېږي.