اشرف غني د کرېکټ ملي لوبغاړو ته: نیمه پایلوبې ته رسېدل یوه ستره لاسته راوړنه وه
د افغانستان مخکینی ولسمشر اشرف غني په نړۍوال شل اوریز جام کې د کرېکټ ملي لوبغاړو له لاسته راوړنو مننه کړې. نوموړي په اېکس پاڼه لیکلي:« زه په ۲۰۲۴ کال شل اوریز نړۍوال جام کې ستاسو د بې سارو هلو ځلو له امله د زړه له کومې مننه کوم.»
هغه وایي، نیمه پایلوبې ته رسېدل یوه ستره لاسته راوړنه ده.
هغه په خپله لیکنه کې ویلي، په دې سختو وختونو کې تاسو افغان ملت ته د یووالي او خوښۍ شیبې وروبخښلې.
هغه وایي:« مننه چې د افغانستان استازیتوب مو په دومره ویاړ سره وکړ.»
هغه د خپلې لیکنې په وروستۍ برخه کې لیکلي:« موږ تاسو ته ستاسو په راتلونکو سیالیو کې د لا بریالیتوبونو هیله کوو. لا وځلېږئ، او موږ پر تاسو ویاړو. تاسو زموږ اتلان یاست.»
له بل پلوه په خواله رسنیو کې له سوېلي افریقا څخه له ماتې وروسته ګڼو افغانانو په خپلو لیکنو کې د افغان لوبډلې ملاتړ کړی دی.
دا لومړی ځل و، چې افغانستان په نړۍوال جام سیالیو کې تر نیمه پایلوبې رسېږي.
وړمه ورځ افغان لوبډلې بنګله دېش ته په ماتې ورکولو سره وتوانېده، چې د نړۍوال جام پایلوبې ته لار ومومي.
نن د نړۍوال جام په پایلوبه کې سوېلي افریقا په نهو وېکټو افغانستان ته ماتې ورکړه او پاییلوبې ته ووته.
