ملګري ملتونه د طالبانو په بندخونو کې پر ښځو د جنسي تیري راپورونه څېړي

اسپکتیتور مجلې راپور ورکړی، چې ملګري ملتونه د طالبانو په بندخونو کې پر ښځو د جنسي تیري د راپورونو په اړه څېړنې کوي. تر دې مخکې د امریکا د بهرنیو چارو وزارت ویلي و، چې د درېیو شمالي ولایتونو په بندخونو کې له ۹۰ ښځو څخه ۱۶ تنه یې د طالبانو له جنسي تیري وروسته امېندواره شوې دي.

اسپکتیتور خبري مجلې راپور ورکړی، چې ملګري ملتونه د طالبانو په زندانونو کې پر ښځو د جنسي تیري په اړه څېړنه کوي.

په افغانستان کې د ښځو پر وړاندې د طالبانو له خوا د جنسي تیري او جنسي تیري په اړه خپرو شویو راپورونو د امریکا د بهرنیو چارو وزارت او د افغانستان د بشري حقونو په چارو کې د ملګرو ملتونو د ځانګړي راپور ورکوونکي ریچارډ بېنېټ اندیښنې راپارولي او ملګرو ملتونو په دې اړه د تحقیقاتو اعلان کړی دی.

د ملګرو ملتونو د بشري حقونو ځانګړی راپور ورکوونکي ریچارډ بېنېټ وویل: "په ټولیزه توګه، موږ د طالبانو له جدي ناوړه چلند څخه خبر یو، نه یوازې جنسي تیری، بلکې د ښځو وهل ټکول، ګواښل او زورول هم." هغه همداراز زیاته کړه چې د ملګرو ملتونو یوه ډله د طالبانو له خوا پر افغان ښځو د جنسي تیري او ناوړه چلند په اړه څېړنه کوي.

د بشري حقونو لپاره ځانګړي راپور ورکوونکي دا هم وویل، چې بله اندېښنه دا ده، چې ښايي ځینې زندانونه د طالبانو د استخباراتو او شخصاً د هغوی د قومندانانو له خوا د زندان د ادارې له واکه بهر اداره کېږي او واقعي معلوماتو ته د څېړونکو لاسرسی محدودوي.

له بلې خوا یو شمېر ښځې چې د طالبانو زندانونه یې تجربه کړي دي، په وار وار په زندانونو کې د ښځو پر وړاندې د طالبانو د ناوړه چلند، شکنجې او جنسي تیري خبره کړې ده.

تر دې مخکې د ډبلیو بوش موسسې د «اشغال شوي دولت» تر نامه لاندې د افغانستان د وضعیت په اړه یو راپور خپور کړی و، چې په هغه کې د طالبانو د چارواکو تر منځ جبري ودونه او د دې ډلې له خوا د خپلو پلویانو د وفادارۍ د پیاوړي کولو په موخه د ښځو اجباري ودونه شامل وو.

دا په داسې حال کې ده، چې د امریکا د بهرنیو چارو وزارت د اپریل په لومړیو کې په افغانستان کې د بشري حقونو د وضعیت په اړه خپل کلنی راپور وړاندې کړ او ویې ویل چې په جوزجان، فاریاب او سمنګان کې بندیانو له ۹۰ ښځو څخه لږ تر لږه ۱۶ ښځې د طالبانو له خوا تر جنسي تیري وروسته امیندواره شوې دي.

د امریکا د بهرنیو چارو وزارت همداراز زیاته کړې، چې طالبانو د جنسي تیري له قربانیانو سره د مرستې لپاره کوم میکانیزم په پام کې نه دی نیولی.