محمود خان اڅکزی: که پر افغانستان نوې جګړه وتپل شي، نو سیمه به د اور په لمبو وسوځي

د پښتونخوا ملي عوامي ګوند مشر محمود خان اڅکزی وایي، د نړۍ «زورواکي او مغرور» دولتونه غواړي چې خپل زور یو ځل بیا زموږ پر سیمو وازمایي؛ خو که داسې وکړي، نو پایلې به یې ویجاړوونکې او له ناورینه ډکې وي.

هغه پر اېکس پاڼه لیکلي، که پر افغانستان نوې جګړه وتپل شي؛ نو سیمه به د اور په لمبو وسوځي.
هغه وایي، ملګري ملتونه، امریکا، روسیه او چین باید د افغانستان او ګاونډیانو ترمنځ یې د ضامن رول ولوبوي؛ چې افغانستان او ګاونډیان یې د یو بل په چارو کې د نه لاسوهنې پالیسي غوره کړي او ډاډ ترلاسه کړي، چې خپلې خاورې د یو بل پر ضد نه کاروي.
هغه د چمن پرلت په تړاو ویلي:« موږ به تر هغې خپلې مبارزې ته دوام ورکوو؛ چې د اساسي قانون له مخې یو داسې نظام رامنځته شوی نه وي، چې پارلمان په کې بشپړ واک ولري، د قانون حاکمیت په کې ټینګ شوی وي او له ټولو قومونو سره یو شان چلند وشي.»
هغه ویلي، په چمن کې سوله‌ییز احتجاج په تاوتریخوالي ځپل کېږي، ډزې پرې کېږي، معترض وژل کېږي او ټپیان کېږي او ډېری یې په زوره نیول کېږي.
هفه زیاته کړې ده، د زور زیاتي دغه کار د بشري حقونو او د قانون له حاکمیته ښکاره سرغړونه ده.
د هغه په وینا، د ډیورنډ پر کرښه له ۱۳۰ کلونو راهیسې د سوداګرۍ او تګ راتګ دودیز نظام باید سمدستي بېرته فعال شي او د پاسپورټ شرط دې له منځه ولاړ شي.
په چمن کې پیل شوی پرلت چې له نهو میاشتو راهیسې وهل شوی په زرګونه پرلت‌وال په کې له پاکستانه غواړي، چې د چمن - سپین بولدک تر منځ دې پر پاسپورټ او ویزو د تګ راتګ پرېکړه بېرته واخلي؛ خو لا هم پاکستاني لوري دغه غوښتنه نه ده منلې او تېره ورځ یې پر پرلت‌والو د برید تر څنګ د هغوی یو شمېر مخکښ کسان نیولي او بندیان کړي دي.