عاصم منېر: د پاکستان پر خاوره تېري ته به سخت ځواب ور کړو

د پاکستان د پوځ لوی درستیز له هند سره پر کنټرول کرښه له خپلو پوځیانو سره د اختر نمانځلو کې ویلي، د پاکستان پر خاوره تېري ته به سخت ځواب ورکړي. عاصم منیر زیاتوي، پاکستان په سیمه کې د سولې او ټيکاو ملاتړ کوي، خو د ځمکني حاکمیت خلاف هر ډول اقدام ته به چټک او کلک ځواب ووايي.

د پاکستان دولتي رادیو د راپور له مخې، عاصم منیر پرون له پاکستاني پوځيانو سره یو ځای له هند سره پوله کې د اختر لمونځ ادا کړ.

نوموړي تر لمونځ وروسته وینا کې زیاته کړه: «دا د ویاړ ځای دی چې امنیتي ځواکونه مو د هېواد د امنیت لپاره له خپلو کورنیو لېې اختر کوي.»
نوموړي د پاکستان له خاورې د دفاع لپاره د امنیتي ځواکونو د عزم او لوړ مورال ستاینه وکړه.
د پاکستان د پوځ مشر تېر کوچنی اختر پر ډیورنډ کرښه له پاکستاني پوځیانو سره ګډ وکړ.

هغه مهال نوموړي له ترهګرۍ سره د خپل هېواد پر مبارزه ټینګار کړی و.