د کرېکټ نړۍوال ۲۰اوریز جام؛د ګوتې ټپ له امله د مجیب پرځای حضرت الله ځاځی لوبډله کې شامل شو

د کرېکټ نړۍوالې شورا د یوې خبرپاڼې په خپرولو سره منلې، چې د مجیب د ګوتې ټپ له امله افغان کرېکټ بورډ اړ شو چې په خپل ۱۵ کسیز سکواډ کې بدلون راولي.

دغه شورا وایي، چې د افغانستان کرېکټ په غوښتنه د مجیب ځدراڼ پرځای د افغان لوبغاړو په ۱۵ کسیز نوملړ کې پیلیز توپ وهونکی حضرت الله ځاځی شامل شو.

د مجیب ګوته د ۲۰۲۴م ای پي اېل لیګ پرمهال ټپي شوه، چې هغه مهال هم نوموړی د دغه ټپ له امله له لوبډلې بهر شو او پرځای یې الله محمد غضنفر په دغه لیګ کې ونیول شو.
مجیب الرحمن له یوګانډا لوبې وروسته په وروستیو دوو لوبو کې د دغو ټپونو له امله نه و لوبېدلی.
د نړۍوال شل اوریز جام سیالیو لپاره د افغانستان په اوسنۍ ۱۵ کسیزې لوبډله کې راشدخان، رحمان الله ګربز، ابراهیم ځدراڼ، عظمت الله عمرزی، نجیب ځدراڼ، محمد اسحاق، محمد نبي، ګلبدین نایب، کریم جنت، ننګیال خروټی، نوراحمد لکڼوال، نوین الحق، فضل الحق فاروقي، فرید احمد ملک او حضرت الله ځاځی شامل دي.
صدیق اتل او سلیم صافی هم د دغه جام سیالیو لپاره د افغان لوبډلې احتیاطي لوبغاړي دي.