سیک زیارت کوونکي د "جور میلې" کې د ګډون لپاره لاهور ته رسیدلي

د هند شاوخوا ۸۴۶ سیک زیارت کونکي نن شنبه د واګا بندر له لارې د پاکستان لاهور ښار ته رسیدلي چې د سیکانو د پنځم ګورو، ارجن دیو جی، د مړینې په یاد د "جور میلې” کې ګډون وکړي.

د پنجاب ایالتي وزير او د پاکستان سیکانو کمیټې مشر سردار رميش سينګ د دغو سیک زیارت کوونکو هرکلي ته ورغلی دی.

سردار رميش سينګ رسنیو سره په خبرو کې ویلي، چې له هند او د نړۍ له بیلابیلو سیمو دغې میلې ته د راتلونکو زیارت کوونکو لپاره چمتووالی نیول شوی دی.

د نوموړي په وینا، د پاکستان حکومت دغو زیارت کوونکو ته د استوګنې ځای، امنيت، طبي اسانتیاوې، د سفر ترتیبات او نورې د اړتیا وړ اسانتياوې برابرې کړي دي.