د چین ولسمشر په پاکستان کې د دغه هېواد د شرکتونو د امنیت د تامین غوښتنه کړې
د چین ولسمشر شي جین پینګ د پاکستان له لومړي وزیر شهباز شریف سره په لیدنه کې، له اسلام اباده وغوښتل چې په پاکستان کې د چینايي شرکتونو امنیت تامین کړي.
په وروستیو میاشتو کې د پاکستان په خیبر پښتونخوا ایالت کې پنځه چینايي انجینران په یوه ځانمرګي برید کې وژل شوي و.
دغه برید د چین له جدي غبرګون سره مخامخ شو او له هغه وخت راهیسې پاکستان له دغه هېواد څخه د چینايي شرکتونو او کارپوهانو د تګ په اړه سخت اندېښمن دی.
پاکستان وايي، چې دغه برید د تحریک طالبان پاکستان له خوا ترسره شوی و او ځانمرګی بریدګر او موټر بم هم له افغانستانه پاکستان ته راوړل شوي وو. په دې وروستیو کې د پاکستان د کورنیو چارو وزارت یو پلاوی د دې موضوع د څېړلو لپاره کابل ته سفر کړی و.
د پاکستان د بهرنیو چارو وزارت ویلي و، دغه پلاوي د طالبانو د کورنیو چارو وزارت سره د دغه برید په اړه د څېړنو پایلې شریکې کړي چې د «بشام» په نوم سیمه کې پر چینایي انجنیرانو ترسره شوی و.
د چين او پاکستان مشرانو د جمعې په ورځ (د غبرګولي ۱۸مه) په بېجينګ کې سره وکتل. شي جين پينګ شهباز شريف ته وويل، چې چين د تل په څېر د پاکستان او د دغه هېواد د ملي حاکميت څخه په کلکه ملاتړ کوي.
هغه ژمنه وکړه، چې چین به د پاکستان په اقتصادي او ټولنیز پرمختګ کې مرسته وکړي.
شهباز شریف په خپلې اېکس پاڼې لیکلي، چې د چین له ولسمشر سره یې د دواړو هېوادونو د څو اړخیزو اړیکو په ګډون په ستراتیژیکو، اقتصادي او سوداګریزو همکاریو او د چین – پاکستان د اقتصادي دهلیز د پروژې په اړه خبرې کړې دي.
شریف لیکلي: « پرېکړه مو کړې چې د چین-پاکستان اقتصادي دهلیز پروژې کار په خپل وخت بشپړې کړو او د دې پروژې راتلونکي پړاو ته د پنځو دهلیزونو په داخلولو سره خپلې اقتصادي همکارۍ زیاتې کړو.»
پاکستان دا مهال له سختو اقتصادي ننګونو سره مخامخ دی. د نړۍوال بانک د شمېرو له مخې، پاکستان له نړۍوال بانک څخه د ١٦،٢ ميليارده ډالر او د اسيايي پرمختيايي بانک نه د ١٣،٧ ميليارده ډالرو پورونو ترڅنګ، له چين څخه هم شاوخوا ٢٧ ميليارده ډالره پوروړى دى.
د پاکستان د ملیاردونو ډالرو پورونو سربیره، شهباز شریف هڅه کوي چې د پیسو له نړېوال صندوق څخه شپږ میلیارده ډالر نوی پور ترلاسه کړي.
