کام ایر هوايي شرکت له خوست څخه دوبۍ ته الوتنې پیل کړې
د طالبانو د ټرانسپورټ او هوايي چلند وزارت اعلان وکړ، چې د خوست او دوبۍ تر منځ د کام ایر هوايي شرکت دوه طرفه الوتنې د یکشنبې په ورځ (د غبرګولي۱۳مه) پیل شوې دي.
د دغه وزارت د خبرپاڼې له مخې؛ دغه شرکت به د یکشنبې او پنجشنبې په ورځو له کابل څخه خوست او له خوست څخه دوبۍ ته الوتنې وکړي.
د یکشنبې په ورځ (د غبرګولي ۱۳ مه) له خوست څخه دوبۍ ته د الوتنې د پیل پر مهال یو شمېر طالب چارواکي هم حاضر وو.
د متحده عربي اماراتو هوايي شرکت تېر کال افغانستان ته خپلې الوتنې بیا پیل کړې وې.
د اتحاد هوايي شرکت هم د روان کال په اپریل میاشت کې د افغانستان له کام ایر شرکت سره د همکارۍ اعلان وکړ.
د اتحاد هوايي شرکت د اعلان له مخې؛ د دې شرکت پېرودونکي کولای شي له ټولې نړۍ څخه کابل او له هغه ځایه د ابوظبۍ په هوايي ډګر کې له کام ایر سره د افغانستان نورو ښارونو ته الوتنه وکړي.
