پاکستان د چین په همکارۍ درېیمه مخابراتي سپوږمکۍ فضا ته وتوغوله
د پاکستان د فضايي ماموریت ادارې (سپارکو) ویلي، چې یاده سپوږمکۍ د چین د شي چانګ له فضايي مرکز څخه توغول شوې ده.
د سپارکو ویاند پاکستاني رسنیو ته ویلي، چې د پاکستان له سپوږمکۍ څخه به تر ټولو ګړندۍ د انټرنټ اسانتياوې برابرې شي او دغه سپوږمکۍ به له ځمکې څخه د ٣٦٠٠٠ کيلومترو په لوړوالي فضا ته واستول شي.
د سپارکو ویاند په اعلامیه کې زیاته کړې، چې له ځمکې څخه فضا ته د سپوږمکۍ په رسولو کې ښايي له درېیو څخه تر څلورو ورځو پورې وخت ونیسي، چې دغه سپوږمکۍ به د برېښنايي سوداګرۍ، برېښنايي حکومتولۍ او اقتصادي فعالیتونو په وده کې مهم رول ولوبوي.
د پاکستان دولتي تلویزون د یو شمېر پاکستاني چارواکو په حواله ويلي، چې دغه سپوږمکۍ ایم ایم یو پاک سیټ نومیږي، چې د پنځلس کلونو لپاره په فضا کې د کار ظرفیت لري او د ټیلفون، تلویزوني خپرونو او براډبېنډ د خدماتو په ښه کولو کې به مرسته وکړي.
پاکستان دا مهال په فضا کې دوه سټلایټونه لري، چې یو یې په ۲۰۱۱ کال کې فضا ته توغول شوی و، چې ماموریت به یې په ۲۰۲۶ کال کې بشپړ شي او دویم یې په ۲۰۱۸ کال کې فضا ته توغولی دی.
