نواز شریف یو ځل بیا د مسلم لیګ ن ګوند مشر وټاکل شو
د پاکستان پخوانی لومړی وزیر نواز شریف له شپږو کلونو وروسته نن بیا د دغه هېواد د مسلم لیګ نواز ګوند مشر وټاکل شو. د مسلم لیګ د پخواني مشر او د نواز شریف د ورور شهباز شریف تر استعفا وروسته نوموړي دې مشرۍ ته ځان کاندید کړ.
نواز شریف د پاکستان په څلورو صوبو او د پاکستان تر واک لاندې کشمیر، ګلګت بلتستان او اسلام اباد کې هم د ګوند مشرۍ ته اسناد جمع کړي وو.
د پاکستاني رسنیو د راپور له مخې؛ نوموړی په ټولو سیمو کې له سیال پرته د مسلم لیګ نواز ډلې مشر وټاکل شو.
د نواز شریف د مشرۍ لپاره په لاهور کې ګوندي غونډه کېږي او هلته به نوموړی په رسمي ډول د ګوند مشر اعلان شي.
د ۲۰۱۷ کال په جولای کې د پاناما دوسیې له امله د پاکستان سترې محکمې په حکم پسې نواز شریف پر لومړي وزارت سربېره له ګوندي مشرۍ هم لرې شو.
