د طالبانو د کډوالو وزارت: له زرو ډېر افغان کډوال له پاکستانه په جبري توګه ستانه کړای شول
د طالبانو د کډوالو او بېرته راستنېدونکو چارو وزارت وایي، چې له یو زرو او ۴۷۹ څخه ډېر افغان کډوال ( د غبرګولي په ۳مه او ۴مه) د سپین بولدک او تورخم له لارو هېواد ته ستانه کړای شوي دي.
د ننګرهار ولایت د تورخم سرحدي امریت د مالوماتو پر بنسټ، ۱۴۲ کورنۍ چې ټولټال ۸۱۳ کسان کېږي په جبري توګه د تورخم لارې راستنې کړای شوې او تر نوم لیکنې وروسته د ملګرو ملتونو عالي کمېشنرۍ او کډوالۍ نړۍوالې ادارې ته د مرستو ترلاسه کولو په موخه وروپېژندل شوې.
بل پلو د کندهار ولایت د سپین بولدک د سرحدي امریت د مالوماتو له مخې، ۱۱۷ کورنۍ چې ټولټال ۶۶۶ کسان کېږي د سپین بولدک له لارې راستنې شوې او د کډوالو په ریاست کې تر نوم لیکنې وروسته د مرستو ترلاسه کولو په موخه د خوړو نړۍوال پروګرام، د ملګرو ملتونو عالي کمېشنرۍ او د کډوالۍ نړۍوالې ادارې ته ورپېژندل شوې دي.
پاکستانۍ رسنۍ دې پاکستان ډیلي تېره اونۍ راپور ورکړی و، چې د ۲۰۲۴ کال د مې تر ۲۰مې نېټې پورې له پاکستانه د ټولو ستنو شویو افغان کډوالو شمېر ۵۷۷۲۳۹ ته رسېدلی او د ستنېدو دغه لړۍ لاهم روانه ده.
د راپور له مخې، د مې له ۱۰مې تر ۲۰مې پورې د ۹۶۸۵ افغان کډوالو له ډلې ۳۴۲۱ یې نارینه، ۳۰۱۷ یې ښځې او ۳۲۴۷ پکې ماشومان وو.
تر دې وړاندې د پاکستان د ایالتونو او سرحدي سیمو وفاقي وزارت په پاکستان کې د راجستر شويو افغان کډوالو د اوسېدو موده د د مې میاشتې تر ۳۰مې نېټې پورې وغځوله؛ خو دغه موده هم د ختمېدو په درشل کې ده.
