د چمن پرلتوالو نن په کوټه کې د چمن د خلکو د ستونزو د لرې کولو لپاره ولسي جرګه وربللې ده
د چمن پرلتوالو دوه اونۍ وړاندې هم دوه ورځنۍ جرګه وربللې وه؛ خو د پاکستان د حکومتي چارواکو سره تر خبرو اترو وروسته له پاسپورټ پرته د سپین بولدک ـ چمن د دروازې د خلاصېدو په اړه هوکړې ته ونه رسېدل.
چمن پرلتوال وايي، دوه اونۍ وړاندې په چمن کې د دوه ورځنۍ جرګې او د پاکستان د حکومت د استازو تر منځ د سپین بولدک ـ چمن پر دروازه د پاسپورټ د جبري کېدو د پرېکړې بېرته اخیستو پر سر توافق ته د نه رسېدو وروسته یې خپلو اعتراضونو ته دوام ورکړی.
د یاد پرلت ویاند صادق خان وايي، نن پنجشنبه یو ځلې بیا په کوټه کې د چمن د ستونزو اړوند جرګه رابلل شوې ده.
صادق خان وايي، په دغه جرګه کې به د سویلي پښتونخوا ګڼ قومي مشران، سوداګر، مدني فعالان او عام وګړي ګډون ولري.
بل خوا په چمن کې ځايي خبریال احمد ظاهر وايي، د تېرو دوه اونیو راهیسې په احتجاجي ډول د چمن کوټې تر منځ عمومي لاره د کوږک غره په سیمه کې د تګ راتګ پر مخ تړل شوې ده.
د نوموړي په خبره، د پاکستان د دولتي بانک او پاسپورټ ادارو تر څنګ یو شمېر نورې ادارې هم د چمن پرلتوالو له لوري بندې شوې دي.
د چمن پرلتوالو د سپین بولدک ـ چمن پر دروازه د پاکستان د حکومت له لوري د ویزې او پاسپورټ د جبري کېدو د پرېکړې د مخالفت په اړه یې په وار، وار له طالبانو څخه هم د مداخلې غوښتنه کړې؛ خو طالبانو تر دې دمه د چمن پرلتوالو په ملاتړ هیڅ غبرګون نه دی په ډاګه کړی.
د چمن له پرلته نږدې اته میاشتې تېرېږي؛ خو تر دې مهاله د پاکستان د حکومت له لوري د پرلتوالو غوښتنې نه دي منل شوې.
