پاکستان او قزاقستان د هر اړخیزو خپلمنځي اړیکو پر پراختیا خبرې وکړې
د پاکستان د لومړي وزیر مرستیال او بهرنیو چارو وزیر د قزاقستان له ولسمشر سره په کتنه کې د دواړو هېوادونو ترمنځ د اړیکو په پراخوالي ټینګار وکړ. د پاکستان د دولتي راډيو د خبر له مخې، محمد اسحاق ډار له قاسم جومارت توکایف سره د شانګهای سازمان د بهرنیو چارو وزیرانو په غونډه کې کتلي دي.
په دې لیدنه کې ښاغلي ډار د څو اړخیزو اړیکو پر پیاوړتیا ټینګار کړی دی.
دا غونډه تېره ورځ او نن د قزاقستان په پلازمېنه استانه کې ترسره شوه.
د راپورونو له مخې، ټاکل شوې وه چې د سازمان د بهرنیو چارو وزیران او د پلاویو مشران به په دې غونډه کې په نړیوالو او سیمهییزو امنیتي، اقتصادي، سیاسي، سوداګریزو، فرهنګي او بشري مسایلو خبرې وکړي.
قزاقستان، چین، روسیه، قرغزستان، تاجکستان، ازبکستان، ایران، هند او پاکستان د شانګهای سازمان غړي دي.
افغانستان، مغولستان، بېلاروس، عراق او سریلانکا د دې سازمان څارونکي غړي دي.
