د پاکستان د کورنیو چارو وزارت په ۲۰۲۳ کې څه باندې ۲ زره ترهګریز بریدونه ثبت کړي
د پاکستان د کورنیو چارو وزارت د جمعې په ورځ ( د غویي ۲۸مه) ویلي، چې په ۲۰۲۳ کال کې د ۲ زره او ۷۵ «ترهګریزو» بریدونو په پایله کې د ۴۰۰سرتېرو په ګډون یو زرو او ۲۱۵ کسان وژل شوي دي.
د پاکستان د کورنیو چارو وزارت د دغو بریدونو د عاملینو نومونه نه دي اخیستي.
د یاد وزارت د شمیرو له مخې، د دغو ترهګریزو بریدونو په پایله کې چې په بېلابېلو ښارونو کې ترسره شوي، دوه زره او ۵۹۳تنه ټپیان شوي دي.
تر ټولو ډير بریدونه په خیبر پښتونخوا کې ثبت شوي دي.
د پاکستان د کورنیو چارو وزارت د شمېرو له مخې، د روان میلادي کال د جنورۍ له پیل راهېسي یوازې په دغه ایالت کې شاوخوا ۵۰۰ "ترهګریز" بریدونه شوي دي.
په دغو بریدونو کې د ۱۱۸ ملکي وګړو په ګډون ۲۸۵ کسان وژل شوي دي. د پاکستان د کورنیو چارو وزارت د دغو بریدونو عاملین نه دي په ګوته کړي.
تر دې مخکې د پاکستان د شخړو او امنیتي مطالعاتو موسسې په یوه راپور کې لیکلي وو، چې په تېره یوه میاشت کې په دغه هېواد کې ترهګریز بریدونه ۳۶سلنه زیات شوي دي.
دغه موسسې زیاته کړې، چې په مارچ میاشت کې پاکستان کې ۵۶ وسله وال بریدونه شوي، خو دغه هېواد په اپریل میاشت کې د ۷۷ ترهګریزو بریدونو شاهد و.
همدا راز،د افغانستان لپاره د پاکستان ځانګړي استازي تر دې مخکې ویلي وو، چې په دغه هېواد کې د پاکستاني طالبانو بریدونه ۶۵سلنه او ځانمرګي بریدونه ۵۰۰ سلنه زیات شوي دي. اصف دراني ادعا وکړه چې په دغو ځانمرګو بريدونو کې افغان وګړي هم لاس لري.
پاکستان په وار وار پر افغان طالبانو تور لګوي چې وسله والو ډلو په ځانګړې توګه د تحریک طالبان پاکستان غړو ته پناه ورکوي، هغه ادعا چې طالبانو په کراتو رد کړې ده.
