بې پولې ډاکټرانو په افغانستان کې د شري ناروغۍ د زیاتوالي خبر ورکړ

د بې پولې ډاکټرانو سازمان په افغانستان کې د شري ناروغۍ د زیاتوالي خبر ورکړ. دغه سازمان وایي، چې سږکال یې په بلخ، هرات او هلمند ولایتونو کې په خپلو روغتیایي مرکزونو کې د هغو نږدې پنځه زره ماشومانو درملنه کړې ده چې په شري ناروغۍ اخته و.

بې پولې ډاکټران وایي، چې دا شمېرې تر تېر کال زیاتې او د اندېښنې وړ دي.
د دغه بشردوستانه سازمان د معلوماتو له مخې، ډېرېر ماشومان چې دغو مرکزونو ته تللي، له يو کال څخه کم عمر لري.
بې پولې ډاکټران راپور ورکوي؛ هغه ماشومان چې په شري اخته شوي د واکسین کولو له وخت څخه یې کم عمر درلود.
په راپور کې زیاته شوې، چې په افغانستان کې ماشومان تر نهو میاشتو پورې د واکسین لومړی دوز نه کوي او دا کار ماشومان د شري په ناروغي د اخته کېدو له ګواښ سره مخ کوي.
بې پولې ډاکټران په افغانستان کې د ماشومانو د شري په وړاندې د واکسین کولو او همدارنګه روغتیایی خدمتونو ته د لاسرسي د ښه کولو لپاره د هڅو د زیاتوالي غوښتنه کوي.

شری د ماشومانو ساري ناروغي ده او دغه راز که ماشوم د شري په څېر په نورو ناروغیو لکه خوارځواکۍ اخته شي، د مړینې له ګواښ سره یې مخ کوي.