د روغتیا سازمان د افغانستان له سېلاب ځپلو سره د اووه مټریک ټنه طبي تجهیزاتو مرسته وکړه
د روغتیا نړۍوال سازمان اعلان وکړ، چې د افغانستان په شمال کې د سېلاب ځپلو سره د مبارزې لپاره یې "سمدستي" اووه مټریک ټنه اړین درمل او طبي وسایل مرسته کړې ده.
دغه سازمان زیاته کړه، چې د څښاک د پاکو اوبو رسولو، د حفظ الصحې بسته بندۍ او د روغتیايي اسانتیاو د برابرولو هڅې روانې دي.
د روغتیا نړۍوال سازمان په یوه خبرپاڼه کې ویلي، چې د طبي مرستو لېږد د افغانستان په شمال کې له سېلاب ځپلو سره د مرستې لپاره د دې سازمان د هڅو یوه برخه ده.
په افغانستان کې د روغتیا نړۍوال سازمان استازي جمشید تنولي وویل: "موږ د قربانیانو له کورنیو سره خپله خواخوږي وړاندې کوو او له روغتیايي چارواکو او خپلو همکارانو سره یوځای په اغیزمنو سیمو کې اړینو روغتیايي خدمتونو ته لاسرسی پېدا کړو."
د روغتیا د نړۍوال سازمان دغه چارواکي ټینګار وکړ، چې د دغه سازمان کارکوونکي اوس مهال په سېلاب ځپلو سیمو کې حضور لري او له خلکو سره د مرستې هڅه کوي.
د روغتیا نړۍوال سازمان هم ویلي، چې د سېلابونو له امله د اوښتو زیانونو کره شمېره لا نه ده معلومه او د دغه سازمان چارواکي له نورو روغتیايي بنسټونو سره په ګډه د وضعیت په اړه څېړنې کوي.
د دغه سازمان په خبرپاڼه کې راغلي، چې په سېلاب ځپلو سیمو کې د اوبو له لارې د ناروغیو د احتمالي خپرېدو د مخنیوي لپاره تدابیر نیول شوي دي.
د روغتیا نړۍوال سازمان وايي؛ په افغانستان کې د سېلابونو له امله په اتو سیمو کې تر دوه زره ډېر کورونه ویجاړ شوي او سلګونه کسان په دغو پېښو کې بې ځایه شوي دي.
د طالبانو او د خوړو د نړۍوال سازمان د تازه خپرو شویو شمېرو له مخې؛ په بغلان کې د سېلابونو له امله تر ۳۰۰ ډېر کسان وژل شوي دي.
