قوش تيپه جام: مس عينک لوبډلې امو ته په ماتې ور کولو پايلوبې ته لار ومونده
په افغانستان کې د قوش تيپې شل اوره جام سياليو کې مس عینک لوبډلې د ۹ منډو په توپير امو لوبډلې ته ماته ورکړه او پايلوبې ته يې لاره ومونده. مس عینک به له بند امير سره پايلوبه کوي.
د افغانستان کرېکټ بورډ وايي، د شنبې د ورځې د قوس تيپې جام د سياليو د شلمې لوبې پچه مس عینک لوبډلې وګټل او لومړی يې د توپوهنې پرېکړه وکړه.
مس عینک لوبډلې په شلو اورنو کې د دوو لوبغاړو په سوځېدو امو لوبډلې ته ۲۰۱ منډې هدف وټاکه.
د مس عینک لوبډلمشر ابراهيم ځدران ۱۰۱ او افسر ځاځي ۷۸ منډې جوړې کړې.
امو لوبډلې دغه هدف پوره نه کړ او په شلو اورنو کې يې د ۹ لوبغاړو په سوځېدو ۱۹۱ منډې جوړې کړې.
مس عینک لوبډلې د ۹ منډو په توپير امو لوبډلې ته ماته ورکړه.
مس عینک لوبډلې په دې سياليو کې دا پنځمه پرله پسې برياوه او پايلوبې ته يې ور سره لار ومونده.
د افغانستان کرېکټ بورډ وايي، د راتلونکې دوشنبې په ورځ به مس عینک لوبډله له بند امير لوبډلې سره پايلوبه کوي او خپل بخت به ازمويي.
دغه سيالۍ په کابل کې پيل شوې دي، چې پنځو کرېکټ لوبدلو برخه پکې اخيستې ده.
