د بلوچستان په ګوادر کې د ناپېژاندو وسلهوالو په ډزو کې اتو کسانو ته مرګ ژوبله واوښته
د ګوادر په سربندان سيمه کې ۷ تنه په داسې حال کې په ډزو وژل شوي، چې په خپلو خونو کې ويده وو. د ګوادر یو پوليس چارواکي محسن علي ویلي، چې ناپېژانده کسانو په ګوادر کې د استوګنې پر کوارټر ډزې کړې دي چې په پایله کې يې اووه کسان وژلي او يو کس ژوبل شوی دی.
محسن علي وايي، وژل شوي او ټپيان د ګوادر روغتون ته لېږدول شوي دي.
د نوموړي په وینا، وژل شوي او ژوبل شوی کس د پنجاب د خانیوال ولسوالۍ اوسېدونکي وو.
د محسن علي په خبره، دغه پېښه د شپې ناوخته درې بجې شوې ده.
څه موده وړاندې هم وسلهوالو د ګوادر په هوايي ډګر د بريد هڅه کړې وه، چې د پاکستان امنيتي ځواکونو لهخوا ناکامه شوې وه.
د پولیسو یوه سیمهییز چارواکي ویلي، چې په دې اړه یې پلټنې پیل کړې دي.
ورته مهال د كورنيو چارو وفاقي وزير محسن نقوي دغه پېښه په کلکه غندلې ده.
محسن نقوي ويلي، چې د قربانيانو له کورنيو سره د زړه له کومې خواخوږي څرګندوي.
له بل پلوه د بلوچستان د کورنیو چارو وزیر میر ضیا لانګو هم دغه پېښه غندلې ده.
هغه ويلي، چې د بې ګناه مزدورانو وژنه ښکاره ترهګري ده او له ترهګرو سره به سخت چلند وشي.
د صوبايي حکومت وياند وايي د پېښې د پلټنې امر يې کړی او ويلي يې دي، چې دوی د ولسوالۍ له ادارې سره په تماس کې دي.
