د سوېلي وزیرستان اوسېدونکي وايي، د ټي ټي پي وسله والو په تېرو دوو ورځو کې د دوی په جوماتونو کې اعلانونه کړي، چې حکومتي محکمو او پوځي ښوونځیو ته به نه ورځي.
دارنګه، د حکومت له لوري د سړک جوړولو پروژې به نه اخلي او ماشومان به نه واکسین کوي.

خو ټي ټي پي په رسمي ډول په دې اړه څه نه دي ويلي.

د سوېلي وزیرستان د اعظم ورسک اوسېدونکی جهانګیر وزیر وايي، تېره ورځ مازدیګر د دوی په جوماتونو کې د ټي ټي پي وسله والو اعلان وکړ چې له حکومتي امتیازونو لرې پاتې شي، هغه وايي: «دا دوه ورځې لګیا دي په جوماتونو کې وايي، د هر چا زامن چې پوځي ښوونځیو کې دي را ویې باسئ، د سړک ټيکې به نورې نه اخلئ، پولیو واکسین بند دی، عدالت ته به ورځئ او ونې به نه وهئ.»
نوموړی وايي، چې له وېرې یې هیچا هم د خبرو ځواب ورنکړ او ټولو خلکو ورسره ومنله چې د دوی په خبرو به عمل کوي.
د دغو بندیزونو اعلانونه تر اوسه پورې په اعظم ورسک، کږه پنګا، مانړه او نرګسي سیمو کې شوي دي.
په خیبرپښتونخوا کې ازاد خبریال او د حالاتو څارونکی لال وزیر افغانستان انټرنشنل پښتو ته وويل چې د ټي ټي پي وسله والو په تازه ګواښونو کې د خلکو ماشومان له زده‌کړو او روغتیايي اسانتیاو بې برخې کړي.
ښاغلی لال وزیر وايي، «ټي ټي پي ډلې ته نوي کسان ننوتي او خپلسري کارونه یې پیل کړي، خلک له عامه خدمتونو منعه کول سم کار نه دی، ښوونځی، سړک، محکمه او د پولیو واکیسن ټول عامه خدمتونه دي چې خلک ورته په ورځني ژوند کې اړتیا لري.»
داسې معلومات هم په دې وروستیو کې افغانستان انټرنشنل پښتو ته رسېدلي چې په سوېلي وزیرستان کې تر لسو ډیر کسان وژل شوي خو د وژلو لامل او وژونکي ډله یې نه ده معلومه.
شنونکي وايي، داسې برېښي چې د پاکستان حکومت د خیبرپښتونخوا ډیرې سیمې د ټي ټي پي وسله والې ډلې ته پرېږدي او دغه سیمه یو ځل بیا د بېلابېلو بهرنیو او کورنیو وسله والو ډلو خوندي سیمه وګرځوي.