د پاکستان کرېکټ بورډ مشر: که مو لوبډله نړېوال جام وګټي هر لوبغاړي ته به سل زره ډالر ورکړم
د پاکستان کرېکټ بورډ مشر محسن نقوي له ایرلینډ او انګلېنډ سره د لوبلړۍ او په نړېوال جام کې د ګډون په موخه د یاد هېواد ملي لوبډلې د تلو پر مهال د لاهور په قذافي لوبغالي کې لیدلي او خپلې لوبډلې ته یې ویلي که نړېوال جام وګټي پر لوبډله به د ډالرو باران وکړي.
د پاکستان جیونیوز رسنۍ د راپور له مخې د پاکستان کرېکټ بورډ مشر محسن نقوي د یکشنبې په ورځ د دغه هېواد له ملي لوبډلې سره په لیدنه کې ویلي: «د نړېوال جام ګټلو په صورت کې به پر لوبډله د ډالرو باران وکړي.»
په دغه لیدنه کې محسن نقوي ویلي، د نړېوال شل اوریز جام ګټلو په صورت کې به هر لوبغاړي ته سل زره ډالر ورکړي.
محسن نقوي هیله څرګنده کړې چې دا ځل به یې لوبډله د پاکستان زرغون بیرغ رپانده وساتي.
نړېوال شل اوریز جام د ویسټ انډیز او امریکا په کوربه توب د جون په لومړۍ نېټه ترسره کیږي.
د نړېوال جام له پیل وړاندې دپاکستان لوبډله له ایرلینډ او انګلېنډ لوبډلو سره د یادو هېوادونو په کوربتوب لوبلړۍ ترسره کوي.
د پاکستان کرېکټ بورډ داسې مهال د کرېکټ شل اوریز نړېوال جام د ګټلو په صورت کې خپلې لوبډلې ته د ډالرو د ورکولو خبره کړې چې یاد هېواد په خپله میلیونونه ډالر له نړېوال بانک څخه پوروړی دی.
