داعش د هرات په ګذره ولسوالۍ کې د شیعه مذهبو پر جومات د برید پړه ومنله
داعش په خپل تلګرامي کانال کې د سه شنبې پر ورځ د هرات د ګذرې ولسوالۍ د محمدي ښارګوټي په جومات کې پر لمونځ کوونکو د برید پړه پر غاړه واخیسته. د طالبانو د کورنیو چارو وزارت ویلي، چې د دوشنبې شپه پر دغه جومات په شوي برید کې د یوې مېرمنې او ماشوم په ګډون شپږ تنه وژل شوي دي.
د طالبانو د کورنیو چارو وزارت ویاند عبدالمتین قانع ویلي، «یو وسلهوال کس په کلاشینکوف پر لمونځ کوونکو ډزې کړې دي.»
عیني شاهدانو ویلي، چې په پېښه کې د ښځو او ماشومانو په ګډون یو شمېر خلک ټپیان شوي دي.
د ګذرې په ولسوالۍ کې محمدي ښارکوټی د هزاره ټبره د اوسېدو سیمه ده، هغه قومي او مذهبي ډله چې ډېر ځله داعش ډلې لهخوا تر برید لاندې راغلې.
یوناما د دغه برید غندنه کړې او د بېړنیو څېړنو غوښتنه یې کړې.
یوناما له طالبانو غوښتي، چې په افغانستان کې د شیعه مذهبو د خوندیتابه لپاره دې بېړني ګامونه واخلي.
د ازادۍ جبهې دغه برید د «نسل وژنې او بشري جنایت بېلګه» بللې او ویلي یې دي، چې دغه ډول کړنې د افغانستان د مېشتو قومونو او مذهبونو تر منځ د مخالفتونو لپاره ترسره کېږي.
د افغانستان لپاره د ژغورنې د ملي مقاومت شورا او د ملي مقاومت جبهې دغه برید غندلی او ویلي یې دي، چې دغه بریدونه د طالبانو د ملاتړو لهخوا ترسره کېږي.
