د افغانستان کرېکټ بورډ د ۲۰۲۴ راتلونکي شل اوریز نړۍوال جام لپاره لوبډله اعلان کړه
د افغانستان کرېکټ بورډ د سې شنبې په ماښام (د غویي ۱۱مه) د ۲۰۲۴ شل اوریز نړۍوال جام لپاره د خپلې لوبډلې نوملړ اعلان کړ.
په دې نوملړ کې رحمن الله ګربز، ابراهیم ځدراڼ، نجیب الله ځدراڼ، او محمد اسحاق توپ وهونکي، عظمت الله اورکزی، محمد نبي، ګلبدین نایب، کریم جنت، راشد خان او ننګیال خروټی الرونډران او مجیب الرحمن، نور احمد، نوین الحق، فضل الحق فاروقي او فرید احمد ملک توپ اچوونکي ټاکلي دي.
افغان کرېکټ بورډ په خپلې فیسبوک پاڼه لیکلي، چې د ۲۰۲۴ شل اوریز نړۍوال جام سیالي د روان کال د جون میاشتې په دویمه نېټه پیلیږي او افغان لوبډله به د جون په درېیمه نېټه د یوګانډا لوبډلې پر وړاندې خپله لومړې لوبه ترسره کړي.
ویل کیږي، چې دغه سیالۍ به د ټورنمنټ په تاریخ کې تر ټولو ستره سیالۍ وي، چې ۲۰ نړۍوال ټیمونه به په نهو ښارونو کې ۵۵ لوبې کوي.
دا لومړی ځل دی، چې متحده ایالات د ۲۰ اوریز نړۍوال جام سیالیو کوربتوب کوي.
بل خوا؛ د کرکټ نړۍیوالې شورا (ای سي سي) د ۲۰۲۴ کال شل اوریز نړۍوال جام نیمه پایلوبې او پایلوبې لپاره د ریزرف ورځ منظور کړې ده.
د ای سي سي د مقررې له مخې؛ که په ټاکل شوې ورځ لوبه ترسره نه شي، نو د سیالۍ لپاره به بله ریزرف ورځ باید ټاکل شوې وي.
په ګروپي پړاو کې د لوبې د بشپړولو لپاره باید په دویمې پاڼۍ کې لږ تر لږه ۵ اورونه ترسره شي، په داسې حال کې چې د ناک اوټ مرحله کې د لوبې بشپړولو ته په دویمې پاڼۍ کې د لس اورونو لوبول اړین دي.
