د پاکستان د پوځ مشر: ملت د هغو عناصرو په وړاندې متحد دی چې د سولې خنډ ګرځي

د پاکستان د پوځ مشر عاصم منیر ویلي، چې د پاکستان ټول ملت د هغو عناصرو په ضد په متحده توګه ولاړ دى چې د دغه هيواد د سولې او پرمختګ خنډ ګرځي او دا چې دغه عناصر به په خپلو هڅو کې بريالي نه شي.

هغه نن جمعه د زرغون پاکستان د ابتکار کنفرنس ته په وینا کې ویلي، چې د پاکستان د اقتصادی پرمختګ د مخنیوي هیڅ هڅه د منلو وړ نه ده.

د پوځ مشر ویلي: “منفي پروپاګند او د ټولنیزو رسنیو له لارې هڅې به مونږ هیڅ کله د پاکستان د اقتصادي پرمختګ او سوکالۍ له پاره له کوښښ څخه په شا نه کړي.”

جنرال عاصم منیر وویل، چې بشپړه خپلواکي او پر ځان بسیاینه له اقتصادي ثبات پرته ممکنه نه ده.

هغه ټینګار وکړ چې منفي تبلیغاتو ته باید پام ونشي او په ګډه باید د پرمختګ او ثبات په لور تمرکز وشي.