ګلبدین نایب نهم افغان لوبغاړی شو، چې په روان ایپياېل کې به ولوبېږي
افغان الراونډر ګلبدین نایب په روان ۲۰۲۴کال ایپياېل کې د ډیلي کپیټل لوبډلې لهخوا واخیستل شو. د خبرونو له مخې، ښاغلي نایب په روان ایپياېل کې د ډیلي کپیټل سره قرارداد هم لاسلیک کړی او ډېر ژر به له دغې لوبډلې سره یوځای شي.
د راپورونو له مخې، ګلبدین نایب د اسټرالیایي الراونډر مېچل مارش پر ځای دغې لوبډلې ته غوره شوی.
مېچل مارش د ټپي کېدو له امله له ایپياېل بهر شوی دی.
ګلبدین نایب نهم افغان لوبغاړی دی، چې د ۲۰۲۴کال ایپياېل کې به ولوبېږي.
تر دې وړاندې راشدخان، عظمت الله عمرزی او نوراحمد لکڼوال په ګجرات لوبډله کې، محمدنبي په ممبیي اېنډینز کې، رحمان الله ګربز او الله محمد غضنفر په کلکته لوبډله کې، نوین الحق په لکهنو لوبډله کې او فضل حق فاروقي په حیدراباد لوبډله کې لوبېږي.
مجیب ځدراڼ هم د کلکتې لوبډلې لهخوا پېرل شوی و؛ خو د ټپي کېدو له امله هغه د الله محمد غضنفر سره بدل شو.
