په ډېره اسماعیل خان کې د ناپېژاندو وسلهوالو په برید کې ۵ کسانو ته مرګژوبله واوښته
د خيبر پښتونخوا په ډېره اسماعيل خان ولسوالۍ کې تېره شپه ناوخته د ناپېژاندو وسلهوالو په یوه برید کې پنځو تنو ته مرګژوبله اوښتې ده. پولیس وایي، په دغه برید کې د پاکستان د ګمرکونو د يوه امر او د هغه د همکار په ګډون درې تنه وژل شوي او دوه نور بیا ټپيان دي.
د ځایي پولیسو په خبره، دغه برید تېره شپه ناوخته هغه مهال شوی چې د خيبر پښتونخوا د ډېره اسماعيل خان د يارک په ټال پلازه کې ناپېژاندو وسلهوالو د دوی پر موټر ډزې وکړې.
تېره اونۍ هم دې ته ورته په یوه برید کې ناپېژاندو وسلهوالو پنځه پولیس وژلي وو.
لاتراوسه د دغه برید پړه چا په غاړه نهده اخیستې.
د یوه بل خبر له مخې، د خيبرپښتونخوا د ډېره اسماعيل خان په کلاچې سیمه کې د ناپېژاندو وسلهوالو په ډزو کې د پاکستان د امنيتي ځواکونو يو افسر وژل شوی دى.
پوليسو د دغې پېښې پخلی کړی او ویلي یې دي، نوموړی د رخصتۍ لپاره خپل کور ته روان وو چې په نښه شو.
په څه کمې یوه اونۍ کې دا درېیم برید دی، چې په دغې ولسوالۍ کې پر دولتي کارکوونکو کېږي.
