د پاکستان توغندیز پروګرام ته د الو برابرولو په تور امریکا پر څلورو کمپنیو بندیز ولګاوه

د امریکا بهرنیو چارو وزارت د پاکستان توغندیز پروګرام ته وسایلو برابرولو له امله د چین پر دریو او د بیلاروس پر یوه کمپنۍ بندیز ولګاوه. دغه وزارت په اعلامیه کې وايي، دغو کمپیونو د پاکستان د لرواټنه توغندیو په ګډون د دغه هېواد د بالستیک توغندیو پروګرام ته اړین مواد برابر کړي دي.

د امریکا بهرنیو چارو وزارت پرون په خپله وېپاڼه کې د دغو څلورو خصوصي کمپنیو په هکله مفصل مالومات خپاره کړي چې د پاکستان د توغندیو برخې ادارو ته کوم ډول مواد برابروي.

خو د پاکستان د بهرنیو چارو وزارت ویاندې د دغه هېواد رسنیو ته نن ویلي، چې د امریکا له نویو بندیزونو مالومات نه لري، خو زیاتوي چې واشنګټن پخوا هم بې ثبوته دا ډول ګامونه پورته کړي دي.

د پاکستان د توغندیز پروګرام په مقابل کې د امریکا نوي اقدامات په داسې مهال دي چې د اسلام اباد چارواکي وايي، دا هېواد ور سره د ترهګرۍ په ګډون په مختلفو امنیتي برخو کې مرستې کوي.