د طالبانو د مشر ملا هبت الله اخوندزاده سلاکار او د جهادي مدرسې مشر په کوټه کې ووژل شو
د طالبانو د مشر ملا هبت الله اخوندزاده سلاکار او په کندهار کې د جهادي مدرسې مشر پرون ماښام د بلوچستان په کوټه ښار کې ووژل شو. د طالبانو د حکومت ویاند ذبیح الله مجاهد بې له دې چې د محمد عمر جان اخونزاده د وژل کېدو ځای ته اشاره وکړي، د نوموړي ترور کېدل یې غندلي دي.
ذبیح الله مجاهد په خپل اېکس د عالمانو وژل «ستر جنایت» بولي او وايي، چې د ښاغلي اخوندزاده مړینه «د هېواد لپاره نه جبرانېدونکې ضایعه ده.»
د شیخ عمر جان په اړه ویل کېږي، چې هغه په اصل کې د زابل ولایت اوسېدونکی او د طالبانو د مشر ملا هبت الله اخوندزاده سلاکار او هغه ته ډېر نږدې کس و.
نوموړی د اختر د رخصتۍ تېرولو لپاره د خپلې کورنۍ لیدو ته د کوټې نوي کلي تللی و، چې د ناپېژانده وسلهوالو په برید کې ووژل شو.
د سرچینو په خبره، په نوي کلي کې د طالبانو د بهرنیو چارو وزیر امیرخان متقي کور هم دی.
ښايي دا لومړی ځل وي، چې په افغانستان کې د طالبانو تر واکمنېدو وروسته د دغې ډلې یو مهم کس په کوټه کې د وسلهوالو لهخوا په نښه کېږي.
تر اوسه کومې ډلې پر نوموړي د برید پړه نه ده منلې او طالبانو هم په دې اړه زیات جزییات نه دي خپاره کړي.
