پاکستان غواړي راتلونکې میاشت د پیسو نړیوال صندوق د پور له نویو شرایطو سره موافقه وکړي
د پاکستان د مالیې وزیر محمد اورنګزیب وايي، دغه هېوادهیله لري چې می میاشت کې د پیسو نړیوال صندوق یا ای ام اف، د نوي پور له شرطونو یا بڼې سره موافقه وکړي. هغه رویټرز خبري اژانس ته ویلي، چې اسلام اباد د نړیوال پور بازار ته د بیرتهاستنیدو لپاره له اړوند ادارو سره خبرې پیل کړې.
ښاغلي اورنګزیب وویل، د پاکستان د اوسني ۳ میلیارده ډالر پور موده د اپریل په وروستیو کې پای ته رسیږي او حکومت غواړي چې د اوږدې مودې او لویې اندازې پور ترلاسه کړي، ترڅو د دغه هیواد اقتصاد ثبات ته لاسرسی ومومي او په دې توګه د ډیری اړتیا وړ اصلاحات رامنځ ته کړي.
نوموړي د پیسو نړیوال صندوق له مشر سره د نړیوال بانک د پسرلني مجلس پر مهال د چهارشنبې په ورځ تر لیدلو وروسته ویلي: "موږ تمه لرو چې دای ام اف کارکوونکې به د م په نیمایي کې په اسلام اباد کې وي - او دا هغه وخت دی چې د هیواد ځینې اقتصادي برخې به وده پیل کړي."
د پاکستان د مالیې وزیر دا نه دي ویلي، چې هیواد کومه اندازه پور ترلاسه کول غواړي، خو اسلام اباد تمه لري چې لږترلږه ۶ میلیارده ډالرو پور ترلاسه کړي.
ښاغلي اورنګزیب زیاته کړه چې، د ای ام اف د پور له منظوریدو وروسته به پاکستان د نورې اضافي مرستې غوښتنه هم وکړي.
د سویلي اسیا دغه بې وزلۍ او تاوتریخوالي ځپلي هیواد په دې وروستیو میاشتو کې د بهرنیو پورونو د لاسته راوړلو توان ترلاسه کړی او د جون میاشتې تر پایه به د پور دغه کچه ۱۰ میلیارده ډالر ته ورسیږي.
ښاغلي اورنګزیب هم وویل، د پور د ترلاسه کولو شونتیا ډیره ده.
"زموږ د دوه اړخیزو پورونو لویه برخه - زموږ د چین د پور په ګدون – به په پام کې ونه نیول شي، نو په دې مانا چې زمونږ وضعیت ښه دی نو زه په دې مالي کال یا راتلونکي مالي کال کې کومه لویه ستونزه نه وینم، ځکه چې مونږ به هر مالي کال کې شاوخوا ۲۵ ملیارد ډالر پور بیرته پرې کوو.
