د وروستیو بارانونو او سېلابونو له امله د کندهار_ روزګان لویه لاره د تګ راتګ لپاره بنده شوه
په کندهار او روزګان کې ځايي طالب چارواکو له خلکو غوښتي، چې پر یاده لاره دې له سفر کولو څخه ډډه وکړي. د روزګان لپاره د طالبانو د والي ویاند اغا ولي انعام وايي، د پنجشنبې په ورځ د (وري ۳۰مه) د تیزو بارانونو او سېلابونو له امله دغه لویه لاره د هر ډول سفر پر مخ بنده شوه.
نوموړی وايي، د دغې لارې د کوندلانو او شاولیکوټ په سیمو کې سېلابونه راوتلي او مسافر دې د ځان خوندي ساتنې په موخه پر دغه لاره سفر نه کوي.
همدارنګه په کندهار ولایت کې هم د طالبانو سیمهایزو چارواکو له مسافرو څخه تر بلې خبرتیا غوښتنه کړې، چې د روزګان او کندهار پر لار له سفر کولو څخه دډه وکړي.
له روزګان څخه ځايي سرچیني وايي، د تېرو څو ورځو پرله پسې بارانونو او سېلابونو له امله د مرکز ترینکوټ، خاص روزګان او چورې ولسوالیو تر منځ لارې د تګ راتګ لپاره تړل شوې دي.
د روزګان ځايي طالب چارواکو ویلي، چې تر دې مهاله په یاد ولایت کې د سېلابونو راوتلو له امله ۱۲ کسان مړه او شپږ نور ټپیان شوي دي.
