وزلوبه؛ طالبانو په بغلان کې د ۵۰ پهلوانانو ترمنځ د وزلوبې سياليو د ترسره کېدو خبر ورکړ

په بغلان کې د طالبانو د ورزش اداره وایي، چې په دې ولایت کې د ۵۰ پهلوانانو ترمنځ د وزلوبې (بزکشۍ) سيالي ترسره شوه. د طالب مسوولانو په خبره؛ دغه سيالۍ د سیمه ييزو لوبو د پراختيا په موخه جوړې شوې وې.

په بغلان کې د طالبانو د ورزش ادارې د دوشنبې په ورځ په يوه خبرپاڼه کې ويلي، چې د دې ولایت د پلخمري په ولسوالۍ کې يې د ۵۰ پهلوانانو ترمنځ د وزلوبې (بزکشۍ) دوې ورځنۍ سيالۍ پای ته ورسولې.

د دوی د معلوماتو له مخې؛ په دې سياليو کې سمېع الله لومړی او اسدالله دویم مقامونه ګټلي دي.

د سياليو نندارې ته د بغلان او سمنګان د طالب مسوولانو ترڅنګ په زیات شمېر ننداره کوونکي هم ورغلي.

د بغلان او سمنګان د طالبانو د ورزش مسوولانو ويلي؛ هڅه کوي سيمه ييزو لوبو ته پراختيا ورکړي او د ولایتي لوبغاړو ترمنځ د یوالي فضا رامنځ ته کړي.