طالبان: د بارانونو او سېلابونو له امله ۳۳ کسان مړه شوي او ۲۷ نور ټپي شوي دي
پېښو ته د رسېدو په چارو کې د طالبانو د وزارت ویاند وايي، چې په ټول افغانستان کې له تيرو دوو ورځو راهيسي د بارانونو او سېلابونو له امله ۳۳ کسان مړه شوي او ۲۷ نور ټپي شوي دی. ملا جانان سایق زياتوي، چې سېلابونو ۶۰۶ کورنه او په سلګونه جريبه کرنيزه ځمکه هم ویجاړه کړې ده.
پېښو ته د رسېدو په چارو کې د طالبانو د وزارت ویاند ملا جانان سایق د یکشنبې په ورځ د (وري ۲۶مه) په کابل کې يوې خبري غونډي ته وويل، چې د تېري جمعې ورځي راهيسي بارانونو، اورښتونو او سېلابونو مالي او ځاني زيانونه اړولي.
نوموړی زیاتوي: « په هيواد کې د اورښتونو او سېلابونو له امله ۳۳ کسان مړه شوي، ۲۷ نور ټپيان شوي دي، ۶۰۶ کورنه په بشپړ ډول نړېدلي او تر زرو ډیرې کورنۍ زيانمني شوي دي.»
د سایق په خبره، د اورښتونو او سېلابونو له امله ۲۰۰ څاروۍ مړې شوي او ۸۵ کيلومتره سړکونه او فرعي لارې يې هم ویجاړي شوې دي.
نوموړي وايي، چې اورښتونو شاوخوا ۱۹۵۵ جريبه کرنيزه ځمکه هم ویجاړه کړې ده.
سایق وايي، چې د مرسته کوونکو ادارو په همکارۍ يې ځينو زيانمنو کورنيو ته مرستې رسولي دي.
دا په داسې حال کې ده چې درې ورځې وړاندې د طالبانو د ټرانسپورټ او هوايي چلند د هوا پیژندنې ریاست د افغانستان په ګڼو ولایتونو کې د چټکو بادونو، بارانونو او سېلابونو د راوتلو خبرداری ورکړی و.
