د شهباز شریف شپږو مخالفو ګوندونو د محمودخان اڅکزي په مشرۍ نوې مخالفه ټلواله جوړه کړه
د پاکستان د تحریک انصاف ګوند عمومي مشر عمر ایوب خان د شنبې په سهار د وري په ۲۵مه له یوې غونډې وروسته د شپږو ګوندونو په ګډون د شهباز شریف د مخالفې ټلوالې د جوړېدو خبر ورکړ.
پاکستانۍ رسنیو ویلي، چې د دغې ټلوالې مشري د محمود خان اڅکزي په غاړه ده.
عمر ایوب خان وویل:« د پاکستان د قانون ساتنې ټلواله» د فبرورۍ د اتمې نېټې پر ضد او د اساسي قانون د ساتلو او د قانون د پلې کولو په موخه رامنځته شوې ده.
د پاکستان د قانون ساتنې د ټلوالې مشر محمودخان اڅکزی وايي:« زموږ په ټلواله کې هیڅ یو ګوند د پوځ سره مخالفت نه لرو. موږ د پوځ په سیاسي کړنو اعتراض لرو.»
ښاغلي اڅکزي وویل، اساسي قانون یو ټولنیز تړون دی او موږ د شنبې ورځې د وري له ۲۷مې وروسته د دغه قانون د خوندي کولو لپاره عمومي غونډې کوو او په دې باور یو، چې د هیڅ یو پوځي او ملکي مامور د خدمت موده دې نه غځول کېږي.
د شهباز شریف د اېتلافي دولت پر ضد لاریونونه د شنبې په ورځ له بلوچستانه پیل شوي او په پام کې ده، چې لمنه یې په ټول پاکستان کې پراخه شي.
د پاکستان د قانون ساتنې په نوې ټلواله کې، د عمران خان د ګوند په ګډون د حکومت نور مخالف ګوندونه سره یو ځای شوي، چې د مسلم لیګ څو ګوندیز اېتلافي حکومت په وړاندې ستونزې پیدا او هغه له ننګونو سره مخامخ کړي.
د عمران خان د تحریک انصاف ګوند، د بلوچستان ملي ګوند، د پښتونخوا ملي عوامي ګوند، جماعت اسلامي، د مسلمینو د یووالي ګوند او د اهل سنت شورا د دغې ټلوالې غړي دي.
