د هواپوهنې اداره د افغانستان په اتلسو ولایتونو کې د ورښت او سېلاب اټکل کوي

د طالبانو په واک کې د افغانستان د هواپوهنې اداره تر راتلونکو ۲۴ ساعتونو د دغه هېواد په اتلسو ولایتونو کې د سخت ورښت او سېلابونو د جاري کېدو اټکل کوي.

د دې ادارې د نننۍ خبرتیا له مخې؛ کابل، هلمند، هرات، ننګرهار، کندهار، کندوز، غزني، فاریاب، پکتیا، پکتیکا، غور، نورستان، بلخ، پروان، بامیان، بدخشان، نیمروز او فراه کې به ورښت وشي.

په خبرپاڼه کې د سالنګ لویې لارې یادونه هم شوې چې سخت ورښت به پکې وشي.

دا لار په تېرو ورځو کې هم د واورې او توپان له امله بنده شوې وه.

له تېرې اونۍ راهیسې د افغانستان په مختلفو برخو کې باران روان دی، چې له امله یې پر کرنیزو ځمکو سربېره، کورونه هم زیانمن شوي دي.