عمران خان وايي، چې مېرمن یې په زندان کې په زهرو مسموم شوې ده
د پاکستان پخوانی لومړی وزیر او د تحريک انصاف ګوند مشر عمران خان په اډياله زندان کې د مقدمې د اورېدنې په مهال دعوه کړې، چې مېرمن يې بشرا بي بي په بني ګاله زندان کې په زهرو مسموم شوې ده. په ورته وخت کې محکمې د پلټنو امر کړی.
نوموړي ویلي: " په دې کې هېڅ شک نه شته چې بشرا بي بي ته زهر ورکړل شوي او زه په دې پوهېږم چې د دې تر شا د چا لاس دی".
عمران خان د چا نوم وانه خیست خو زیاته یې کړه، چې د بشرا بي بي په پوستكي او ژبه ځینې نښې موجودې دي، چې د مسمومېدا ګواهي ورکوي.
هغه له عدلي او قضايي ارګانونو غوښتنه کړې، چې د نوموړي د مېرمنې د طبي معایناتو او پلټنو امر دې وکړي.
محکمې هم د پلټنو امر کړی.
تېره ورځ د اسلام اباد سترې محکمې اعلان وکړ، چې د توشه خانې په قضیه کې د پخواني لومړي وزیر عمران خان او د هغه د مېرمنې بشرا بي بي د ۱۴ کلونو بند سزا یې ځنډولې او په ضمانت يې د خوشي کېدو امر کړی دی.
د اسلام اباد د سترې محکمې مشر قاضي عامر فاروق ویلي، چې د عمران خان او د هغه د مېرمنې د توشه خانې د قضیې سزا یې ځنډولې ده او د ضمانت د منظورېدا پرېکړه یې کړې ده.
د توشه خانې په قضیه کې پر پخواني لومړي وزیر عمران خان او د هغه پر مېرمنې تور و، چې یو شمېر قیمتي ډالۍ یې دولتي خزانې ته نه دي سپارلې او له همدې امله یې دواړو ته څوارلس - څوارلس کاله د بند سزا اورولې وه او د پي ټي ای مشر عمران خان یې د لسو کلونو لپاره نا اهله اعلان کړی و.
پر عمران خان تور دی، چې له ۲۰۱۸ څخه تر ۲۰۲۲ کال پورې یې د خپلې صدراعظمۍ پر مهال له بهرنیو هېوادونو څخه قیمتي ډالۍ تر لاسه کړې او بیا یې دغه ډالۍ په ۶۳۵ زره ډالرو پلورلې دي.
د عمران خان په ډالیو کې د سعودي عربستان یو قیمتي ساعت هم شامل دی، چې د کعبې یوه نښه لري او په نړۍوال بازار کې یې بیه له ۶۰ تر ۶۵ کروړه پاکستانۍ روپۍ اټکل شوې ده.
همدا راز پر عمران خان تور دی، چې دولتي رازونه یې افشا کړي دي.
