خواجه اصف: له ټيټيپي څخه د طالبانو ملاتړ په پاکستان کې د نا امنیو لړۍ روانه ساتلې
د پاکستان د دفاع وزیر خواجه اصف یو ځلې بیا له افغانستانه د دوی د حکومت پر ضد د ګواښونو د ډېروالي خبره کړې او دا ځل یې په زغرده ویلي، چې نور د واکمنو طالبانو لپاره د پاکستان انتخابونه مخ په محدودېدو دي.
د پاکستان د دفاع وزیر چې پرون یې د خپل هېواد پارلمان ته وینا اوروله، د دغو انتخابونو د محدودېدو په اړه یې نور جزییات نه دي ورکړي.
له هغه مهاله چې طالبان په افغانستان کې واک ته رسېدلي، ورسره هممهاله په ګاونډ پاکستان کې د پاکستاني طالبانو په بریدونو کې پام وړ زیاتوالی راغلی، چې په ډېرو دغو بریدونو کې ټيټيپي د خپلې ښکېلتیا منښته هم کړې.
خو پاکستاني چارواکو په وار، وار دا خبره تکرار کړې چې د دوی مخالفو وسلهوالو ته په افغانستان کې پټن ځایونه ورکړی شوي، په وسلو سمبالېږي او بیا په پاکستان کې د بریدونو لپاره استول کېږي.
د افغانستان لپاره د پاکستان ځانګړي استازي هم څه موده مخکې تور پورې کړی و، چې د دغه تحریک شاوخوا ۷ زره جنګیالي په افغانستان کې فعال دي او د یو شمېر افغانانو په منځګړیتوب له هنده مرستې او پیسې ترلاسه کوي.
خو دا او دې ته ورته تورونه په هر ځل د طالبانو لهخوا رد شوي او هغه یې د نا امنیو په پېښو کې د پاکستان د امنیتي ځواکونو د پاتې راتلو نښې بللې او دا یې هم ویلي، چې پاکستان د خپلو ناکامیو پړه پر نورو وراچوي.
