د بلوچستان په ګوادر کې له وسله والو بریدګرو سره په نښته کې دوه پاکستاني پوځیان ووژل شول
د پاکستان امنیتي سرچینو اعلان کړی، چې د بلوچستان په ګوادر کې له «ترهګرو» سره په نښته کې لږ تر لږه دوه پوځیان وژل شوي او څلور نور ټپیان شوي دي. د سرچينو د معلوماتو له مخې، بريدکوونکو پاکستاني پوځیانو د ماين د شنډولو ډله په نښه کړې ده.
پاکستاني رسنیو د یکشنبې په ورځ (د وري په ۱۲ مه) د یوې پوځي سرچینې په حواله راپور ورکړ، چې وسله والو بریدګرو د ګوادر ښار شمال لوېدیځ ته په ۲۵ کیلومټرۍ کې د اکرا کویر ور بند په سیمه کې د پاکستان د پوځ د ماین پاکۍ پر یوې ډلې برید وکړ.
تر اوسه کومې ډلې د دې برید مسوولیت نه دی منلی.
د سرچينې د معلوماتو له مخې، دغه بريد هغه مهال رامنځته شو، چې پاکستاني ځواکونه د ماين پاکولو د عملياتو پرمهال د وسله والو بريدګرو له کمين سره مخ شول، چې له امله يې دوه سرتېري وژل شوي او څلور نور ټپيان دي.
سرچينې وايي، چې تر اوسه د بريدګرو د مرګ ژوبلې راپور نه دى ورکړل شوى او د لټون عملياتو لپاره د پوځ څرخي الوتکې سيمې ته استول شوي دي.
د یادولو ده، چې په دې وروستیو کې پر پاکستاني پوځيانو وسلوال بريدونه زيات شوي دي.
