د افغانستان د فوټبال ملي لوبډله نن د هندوستان پر وړاندې د لوبو ډګر ته ښکته کېږي
د ۲۰۲۶ نړۍوال جام او د ۲۰۲۷ اسیا جام ته د لارموندنې لپاره د هندوستان او افغانستان ترمنځ دغه سیالي نن په اندراګاندي لوبغالي کې ترسره کېږي. دغه لوبه د کابل په وخت د ماښام په شپږو بجو پیلېږي.
افغانستان تر دې وړاندې د وري په دویمه د هند پر وړاندې په سعودي عربستان کې سیالي مساوي پای ته ورسوله او تر هغه مخکې د دغو سیالیو دوه یې د ۴-۰ او ۱-۸ په توپیر د قطر او کویټ پر وړاندې بایللې وې.
تر دې دمه افغان لوبډله له هند سره په ۱۱ سیالیو کې مخامخ شوې، چې پنځه یې هند، یوه یې افغانستان او پنځه نورې یې بې پایلې پای ته رسېدلې دي.
