د لغمان په مرکز مهترلام کې د ۳۶ لوبډلو ترمنځ د واليبال رمضان جام سيالۍ پيل شوې
په لغمان ولايت کې د طالبانو تر کنټرول لاندې د بدني روزنې او ورزش امريت او واليبال فدراسيون په همغږۍ د ۳۶ لوبډلو ترمنځ د رمضان جام سيالۍ پيل شوې. د فدراسیون په وینا، د دغه جام سیالۍ به تر رتلونکو ۱۵ ورځو دوام وکړي.
د دغې سیالۍ لومړۍ لوبه د سولې ارمان راډيو او ډنډرو کلي لوبډلو ترمنځ وشوه، چې په پايله کې یې سولې ارمان راډیو خپلې سيالې لوبډلې ته د ۲_۰ په توپير ماتې ورکړه او بریالۍ شوه.
د دغو سياليو د ترسراوي موخه د غوره څېرو پېژندل، د لوبغاړو ترمنځ د تجربو شريکول، د نشهیي توکو پر ضد مبارزه او د ځوانانو ترمنځ یووالی ښودل شوی دی.
