پاکستان د یوې ورځې په ځنډ په کندهار کې ځانمرګی برید وغانده
کندهار کې پر نوي کابل بانک له ځانمرګي برید یوه ورځ وروسته د پاکستان بهرنیو چارو وزارت دا برید غندلی او د پېښې له قربانیانو سره یې خواخوږي ښودلې. د ا وزارت نن په خپله اعلامیه کې وايي، «ترهګري مشترکه اندېښنه ده او د له منځه وړلو لپاره د پاکستان او افغانستان ګډو هڅو ته اړتیا لري.»
د کندهار ښار څلورمه ناحیه کې پرون سهار ځانمرګي د کابل بانک د دروازې مخ ته د مراجعانو منځ کې چاودنه وکړه.
داعش د دې برید مسوولیت منلی او وايي، د دغې ډلې یو غړي معاویه پنجشیري په دې برید سره لسګونه طالبانو ته مرګ ژوبله اړولې ده.
د میرویس روغتون سرچینو افغانستان انټرنشنل - پښتو ته نن وویل چې دې برید کې ۴۳ کسان وژل شوي او تر ۴۵ ټپیان دي.
نوی کابل بانک د تېر افغان جمهوریت په څېر له طالبانو سره هم د تړون له مخې د دې ډلې امنیتی ځواکونو ته تنخا اجرا کوي او مرګ ژوبله هم تر ډېره طالبانو ته اوښتې ده.
د ایران بهرنیو چارو وزارت، د افغانستان لپاره د امریکا د سفارت شازدافیرې او ځانګړي استازي او یوناما دا برید غندلی دی.
د پاکستان دا په څنډ غندنه په داسې حال ده چې له طالبانو سره یې تر بل هر وخت اړیکي ترینګلي ښکاري.
اسلام اباد طالبان د ټي ټي پي په ساتلو تورنوي او تېره دوشنبه یې پکتیکا او خوست کې په بمبار سره د پاکستاني طالبانو د په نښه کولو ادعا وکړه.
طالبان وايي، دې بریدونو کې ولسي وګړي وژل شوي او په مقابل کې یې د پکتیا په ډنډپټان کې له ډیورنډ کرښې سره د پاکستان پر سرحدي پوستو برید وکړ.
