ملګري ملتونه وایي، چې په تېره لسیزه کې یې په افغانستان کې '۲۳ مېلیونه' نیالګي کېنولي دي

د خوړو نړۍوال پروګرام ویلي، د خپلو ملاتړو ادارو سره یې په افغانستان کې په تېرو لسو کالو کې ۲۳ مېلیونه نیالګي نال کړي دي.

د ملګرو ملتونو د دغه بنسټ په وینا، دغه نیالګي د دې تر څنګ چې خاوره خوندي ساتي د زرګونو کورنیو سره دا مرسته هم کوي چې ښه او روغتیایي خواړه وخوري او د مېوو له خرڅلاوه یې ګته هم تر لاسه کړي.
تر دې وړاندې د طالبانو تر واک لاندې کابل ښاروالۍ هم ویلي و، چې سږ کال به د دوه مېلیونو په شاوخوا کې نوي نیالګي نال کړي.
په افغانستان کې هر کال په پسرلي کې هم حکومتي چارواکي او هم ولسي خلک د نویو نیالګیو د نالولو لپاره هڅې کوي؛ خو بیا یې د پالنې او روزنې په کار کې د نه پاملرنې له امله دغه نیالګي وچېږي او له منځه ځي.