د خیبر پښتونخوا حکومت د دغه ایالت زندان ته د عمران خان د لېږدولو غوښتنه وکړه

د خیبر پښتونخوا حکومت چې دا مهال د تحریک انصاف ګوند په واک کې دی، له اډیاله زندانه یې د خیبر پښتونخوا زندان ته د پخواني لومړي وزیر عمران خان د لېږدولو غوښتنه وکړه.

دغه غوښتنه د هغو لیدو کتو د منعه کېدو په غبرګون کې شوې، چې د عمران خان لپاره د امنیتي ګواښونو په برخه کې رامخته شوې دي.
د خیبر پښتونخوا د اعلی وزیر د اطلاعاتو سلاکار محمد علي سېف د سه شنبې په ورځ د کب په ۲۹مه وویل، که د پنجاب حکومت نه شي کولای د عمران خان امنیت د اډیالې په زندان کې ټینګ کړي، هغه دې د خیبر پښتونخوا زندان ته راولېږدوي.
تر دې وړاندې د پاکستان د ترهګرۍ سره د مبارزې ادارې د هغو درې تنه افغان تورنو په اړه ویلي و، چې د اډیالې پر زندان یې د برید هوډ لاره نیولي دی او ورسره یې د دوو اونیو لپاره د همدغو امنیتي ګواښونو له امله د عمران خان پر ملاقاتونو او له هغه سره د خلکو په لیدو کتو بندیزونه ولګول.
د تحریک انصاف ګوند بنسټ اېښودونکی او د پاکستان پخوانی لومړی وزیر عمران خان د فساد او درغلیو په تور له څو میاشتو راهیسې په اډیاله زندان کې بندي دی.