بلوڅ بېلتونپالو د بلوچستان په ګوادر بندر کې د برید مسوولیت ومانه
د بلوچستان ازادۍ پوځ په نوم بلوڅ بېلتونپالې ډلې د پاکستان بلوچستان کې د ګوادر بندر پر اداره یا جي پي اې د برید مسوولیت ومانه. دغه ډله د اعلامیې خپرولو سره وايي، چې د مجید لېوا د ګوادر بندر اداره کې د پاکستان د استخباراتي ادارې یا اې اېس ای ودانۍ په نښه کړې دی.
د ګوادر بندر اداره کې د پاسپورټ او ټاکنو کمېسون سربېره مختلفې حکومتي دارې کار کوي، خو بلوڅ بېلتونپال وايي، چې دلته یې د ای اېس ای ودانۍ په نښه کړې دي.
له سیمې افغانستان انټرنشنل پښتو ته رسېدلې ویډیووې هم ښيي چې له ځینې ودانیو لوګي پورته کېږي او د سپکو وسلو ډزې کېږي.
د بلوچستان ازادۍ پوځ په نوم ډله وايي، ځايي وخت دوه بجې یې دوو ځانمرګو دا برید کړی دی او لا هم روان دی.
پاکستانۍ رسنۍ د سرچینو په حواله وايي، چې په دغه برید کې اتو وسلوالو ګډون درلود او د پاکستان امنیتي ځواکونو په ځوابي برید کې وژل شوي دي.
خو لا هم له سیمې بې پرې سرچینو دا نه ده تایید کړې چې څو وسلوالو برید کړی او دا برید پای ته رسېدلی که لا هم روان دی.
د ګوادر بندر د پراختیا پروژه چې پاکستان یې د چین په همکارۍ پرمخ بیايي تېرو کلونو کې له ورته بریدونو سره مخ شوې ده، چې تر ډېره یې مسوولیت بلوڅ بېلتونپالې ډلې مني.
دوی اسلام اباد د بلوچستان د ځايي خلکو د سرچینو پر لوټلو تورنوي او پر پاکستان سربېره چین ته هم خبرداری ور کوي چې له دې پروژې تېر شي.
د پاکستان حکومت د ګوادر بندر پراختیا پر بلوچستان او دغه هېواد سربېره د سیمې د پرمختګ لپاره اړین بولي.