د غزني په جاغورۍ ولسوالۍ کې د ۲۰ لوبډلو ترمنځ د فوټسال سیالۍ ترسره شوې
په غزني ولایت کې د طالبانو تر کنټرول لاندې د بدني روزنې او ورزش امریت له لوري د دغه ولایت جاغورۍ ولسوالۍ له بېلا بېلو سیمو د ۲۰ لوبډلو ترمنځ د فوټسال سیالۍ د نوین مرکز لوبډلې په اتلولۍ پای ته ورسېدې.
دغو سیالیو دوه اوونۍ دوام وکړ، چې په پایلوبه کې د نوین مرکز لوبډلې خپلې سیالې امید کوشه لوبډلې ته د ۶/۲ امتیازونو په توپیر ماتې ورکړه.
په دغو سیالیو کې عتیق یوسفي د ۳۴ ګولونو په وهلو غوره ګول وهونکی، محمد علي غوره لوبغاړی او علي سینا فصیح غوره ګول ساتونکی وپېژندل شو.
د دغو سیالیو موخه د فوټسال ورزش وده او د ځوانانو ترمنځ د یووالي رامنځته کول ښودل شوي دي.
په پای کې د چارواکو لهخوا غوره لوبډلې ته د کپ ترڅنګ غوره لوبغاړو ته مډالونه، جایزې او ستاینلیکونه ورکړل شول.
