ټيټيپي: د م.م د امنیت شورا په غونډه کې د پاکستان د دایمي استازي څرګندونې بې بنسټه دي
د پاکستان د طالبانو تحریک ویاند محمد خراساني د یوې خبرپاڼې په خپرولو سره په ملګرو ملتونو کې د پاکستان د دايمي استازي "منیر اکرم" څرګندونو ته په غبرګون کې ویلي، چې دغه شان څرګندونې هیڅ ډول بنسټ نه لري او له ملګرو ملتونو یې غوښتي چې په دغسې بې بنسټه څرګندونو باور و نه کړي.
د ملګرو ملتونو په امنیت شورا کې د پاکستان دایمي استازي ویلي و، چې ټيټيپي نن سبا له پرمختللو وسلو کار اخلي او له دوی سره مالي ملاتړ څوک کوي؟
په خبرپاڼه کې راغلي، چې دغه ډله خپلې ټولې کارېدونکې وسلې او مهمات د پاکستان له مارکیټونو په ډېره ارزانه او اسانه توګه په پیسو اخلي او په لیکنه یې چې د دغو بازارونو د چلښت تر شا د پاکستان د پوځي جنرالانو لاس دی.
په خبرپاڼه کې د مالي تمویل په اړه راغلي، نن سبا دوی د خرپ او ترپ جګړه پر مخ وړي چې ډېرو امکاناتو ته اړه نه لري.
دا رنګه په خبرپاڼه کې ویل شوي، چې له دوی سره ولسي خلک مرستې کوي او دوی خپل لګښت د ولسي خلکو په مالي ملاتړ پوره کوي.
د خبرپاڼې په ووروستۍ برخه کې راغلي، چې دوی د پاکستان له پوځ سره په روانه جګړه کې (چې دوی ورته جهاد پاکستان نوم کارولی) د هیچا خاوره نه ده کارولې او هیڅ یو هېواد ورسره مرسته نه ده کړې.
دوی وایي، پاکستاني پوځ او پولیس د امنیت په ټینګښت کې پاتې راغلي؛ نو ځکه د خپلې ناکامۍ پړه پر نورو اچوي.
تر دې وړاندې پاکستاني چارواکو په وار، وار ویلي وو، چې د ټيټيپي غړي په افغانستان کې دي او ټول بریدونه له هغې خاورې پلانوي، هغه څه چې هم د افغانستان طالبانو او هم ټيټيپي یې په بیا، بیا ردې کړې دي.
