افغان ملي لوبغاړي نور علي ځدراڼ نړیوال کرېکټ پرېښود
د افغانستان کرېکټ بورډ وايي، د دغه هېواد د ملي لوبډلې لوبغاړي نورعلي ځدراڼ نن له نړیوال کرکټ سره مخه ښه وکړه. د کرېکټ بورډ د خبرپاڼه له مخې، نوموړي ته د افغانستان او ایرلنډ د لوبلړۍ له پیلېدو مخکې د مخه ښې مراسم جوړ شوي و.
نور علی ځدراڼ په ۲۰۰۹ م کال کې د افغانستان په استازۍ نړیوال کرېکټ ته وتلو سره لومړنۍ لوبه له سکاټلنډ سره وکړه.
په نړیوال کرېکټ کې د نوموړی وروستۍ لوبه هم له ایرلنډ سره وه چې افغانستان پکې ماته وخوړه.
افغان کرېکټ بورډ وايي، نور علي ځدراڼ تر اوسه د افغانستان په استازیتوب دوه ټېسټ، ۵۱ نړیوالې یو ورځنۍ او ۲۳ نړیوالې شل اوره سیالۍ کړې دي.
نوموړي په نړیوال کرېکټ کې د یوې سلیزې او ۱۱ نیمه سلیزو پر مټ نږدې ۲۰۰۰ منډې جوړې کړې دي.
