د پاکستان ستره محکمه: د ذوالفقار علي بوټو د اعدام لپاره محاکمه عادلانه نه وه
د پاکستان ستره محکمه وايي، د دغه هېواد د پخواني لومړی وزیر او د پیپلز ګوند د بنسټګر ذوالفقار علي بوټو اعدام په عادلانه محاکمه کې نه و شوی. ذوالفقار علي بوټو ۴۴ کاله پخوا د پاکستان د پخواني پوځي ډیکټاټور جنرال ضیا الحق په واکمنۍ کې د یوه کس د وژلو په تور محاکمه او په دار شو.
د پاکستان د پیپلز ګوند شریک مشر او د ښاغلي بوټو زوم اصف علي زرداري پر ۲۰۱۱ کال خپله ولسمشرۍ کې د خپل خسر اعدام عدالتي قتل بللی و او په دې هکله یې ستره محکمه کې عریضه کړې وه.
د پاکستان لوی قاضي فایض عیسا د دې عریضې په ځواب کې نن د یوه نهه کسیز پلاوي تر څېړنو وروسته وویل، چې د ذوالفقار علي بوټو د محاکمې لپاره مناسب شرایط برابر نه و: «موږ داسې څه ونه موندل چې وښيي عادلانه محاکمه او د لګېدلو تورونو لپاره عادلانه بهیر تر سره شوی وي.»
د ذوالقار علي بوټو لمسي او د اصف علي زداري زوی بلاول بوټو زرداري د محکمې له نننۍ پرېکړې وروسته خپل اېکس کې ولیکل، چې د کورنۍ درې نسلونه یې د داسې خبرو د اورېدو په تمه وو.
ښاغلی بلاول زیاتوي، چې ۴۴ کاله وروسته تاریخ سمېږي.
د ضیاالحق حکومت په ۱۹۷۷ کال کې ذوالفقار علي بوټو ونیو او پر ۱۹۷۴ کال یې د یوه قاضي پر وژلو تورن کړ.
د لاهور سترې محکمې پر ۱۹۷۸ کال ښاغلي بوټو ته د مرګ سزا واروله او نوموړی د ۱۹۷۹ کال د اپرېل پر څلورمه په ایډیاله جېل کې اعدام او د شپې د سیند صوبې په لړکانه کې خاورو ته وسپارل شو.
